SugponewsBlog

Candon City, Ilocos Sur - “Agyamanak kenni Apo Dios iti panakaiparsuak.” Kinuna ni Congressman Eric Singson iti naragsak a panangrambakna iti kasangayna a naigiddato iti panakarambak iti aldaw dagiti Tatang idi Hunio 15 idiay Candon Civic Center.

Dagiti bisita ken nangipaay iti mensahe ket pakairamanan da Gobernador Luis Ryan Singson ti probinsia ti Ilocos Sur, Gobernador Eustaquio Bersamin iti probinsia ti Abra, Congressman Victor Ortega ken ni sigud a San Fernando City Mayor Mary Jane Ortega iti La Union, Congressman Nicasio Aliping, Jr. iti Baguio City, Bishop David William Antonio ti San Juan de Sahagun Parish Church ken dagiti papadi, Mayor Ericson Singson ken dagiti mamayores iti maikaddua a distrito ti Ilocos Sur.

Malaksid kadakuada ket immay ken kinablaawan pay dagiti Regional Director ken Provincial Directors ti naduma-duma nga ahensia ti gobierno, dagiti bise-mayor ken konsehales iti naduma-duma nga ili ken dadduma pay a nakipagrambak iti kasangayna.

Sakbay iti programa iti Candon Civic Center, immun-una pay a naaramid ti Misa iti simbaan Katoliko iti Candon babaen kenni Bishop Antonio. Simmaruno ti programa iti civic center a nakairamanan ti programa ken naragsak a kankanta babaen iti panangidaulo ni Jay Cayuca a maysa a premier violinist iti pagilian a Pilipinas.

“Agyamanak ta naikkanak iti gundaway nga agserbi kadagiti tattao ken addaanak iti naragsak a pamilia.” Kinunana iti interview kenkuana iti sanguanan dagiti nagkaadu a tattao a nangiyabrasa iti panangikablaaw kenkuana.

Nagbalin a naisangsangayan ti kasangayna gapu iti panangipaay ni Jay Cayuca iti sonata para kadagiti amma a maramrambakan iti daytoy nga aldaw.

Nagbalin pay a good mood ni Congessman Singson iti panangpalugodna iti panaki-picture kadagiti tattao nangruna kadagiti scholars iti programana a kas koma ti Candon City Culinary Arts, Government Apprentice Program, Congressman Eric D. Singson Scholarship Grant (CEDSSG), dagiti empleado iti opisinana, kameng ti media ken dagiti kangrunaan iti amin iti pamiliana.